اولو تانری نین آدی ایله

بیر گون حضرت سولئیمان قوشونو ایله یولدان کئچیردی . گؤردو یولون اوستونده بیر قاریشقا دوروب . حضرت سولئیمان ائله بیلدی کی ، قاریشقانین اوندان بیر دیله‌یی وار .

حضرت قاریشقادان سوروشدو :

- آ قاریشقا ، بوردا نیه دوروبسان ؟ اولمایا مندن بیر دیله‌یین وار ؟

قاریشقا دئدی :

- دونیایا گلیب - گئدن سولئیمان لاری سایماق اوچون بوردا دورموشام .

حضرت سولئیمان دئدی :

- دونیایا نئچه سولئیمان گه‌لیب ، گئدیب ؟

قاریشقا دئدی :

- سنله یئتمیش سولئیمان .

حضرت سولئیمان سوروشدو :

- بونو نه ایله بیلیرسن ؟

قاریشقا دئدی :

- عاقیللا ، باجاریقلا ، قناعه تیمله .

حضرت سولئیمان دئدی :

- عاغیللی اولدوغونو نه‌دن بیلیم ؟

قاریشقا دئدی :

باشیمین یئکه لییبیدن .

حضرت سولئیمان سوروشدو :

- باجاریقلی اولدوغونو نه‌دن بیلیم ؟

قاریشقا دئدی :

- ال - آیاغیمین چئویکلیییندن .

حضرت سولئیمان سوروشدو :

- قناعتلییینی نه‌دن بیلیم ؟ 

قاریشقا دئدی :

- بئلیمین اینجه لیییندن .

حضرت سولئیمان دئدی :

- سن نئجه قناعت ائلیه بیلیر سن ؟

قاریشقا دئدی :

- من بیر بوغدا ایله یئدی ایل دولانا بیله‌رم .

حضرت سولئیمان دئدی :

- قاریشقا ، سه‌نین بو سؤزلرینی سینایاجاغام .

دئدیک لرین دوغرو چیخدی ، نه ایسته‌سن سه‌نه وئره‌جه‌یم ، یالان چیخدی ، سه‌نی اؤلدوره‌جه‌یم .

قاریشقا دئدی :

- مه‌نیم سؤزلریم دوغرودور . سینایا بیلرسن .

حضرت سولئیمان قاریشقانی گؤتوردو ، شهره گلدی . حضرت سولئیمان قاریشقانی بیر شوشه‌نین ایچینه قویدوردو ، یانینا دا بیر بوغدا سالدیردی . شوشه‌نین آغزینی برک - برک موشه‌مه‌لتدی ، سونرا گؤیدن آسدیردی.

ناغیل لاردا واخت تئز گه‌لیر . حضرت سولئیمانین باشی کئفه قاریشدی ، گونلر گه‌لیب کئچدی . بیردن حضرت سولئیمان یادینا سالدی کی ، قاریشقانی شوشه‌یه سالدیغی واختدان یئدی ایل کئچیب . آدام لارینا دئدی :

- قاریشقانی بورایا گه‌تیرین . قاریشقانی حضرت سولئیمانین حوضورونا گه‌تیردی لر . حضرت سولئیمان شوشه‌نین آغزینی آچدی . گؤردو قاریشقا او گؤردویو کیمی ایدی ، ساغ - سالامات دیر . بوغذانین دا حه‌له اوچده بیری دورور . حضرت سولئیمان اوندان سوروشدو :

- آ قاریشقا ، بو بوغدانین اوچده بیرینی نییه یئمه یییبسن ؟

قاریشقا دئدی :

- حضرت سولئیمان بیر اهل کئف آدامدی . قورخوردوم کی ، یئددی ایلدن سونرا دا یادینا دوشمه‌یم  ، آجیندان اؤله‌م . اونا گوره ده بوغدانین اوچده - بیرینی ساخلادیم .

حضرت سولئیمان دئدی :

- قاریشقا ، بو سؤزون دوغرو چیخدی . ایندی باجاریغینی سینایاجاغام . بیر خیرمان تاخیلی نه واختا یووانا داشییا بیلرسن ؟

قاریشقا دئدی :

- مه‌نه توخونان اولماسا بیر گونه .

حضرت سولئیمان قاریشقانی بیر خیرمان تاخیلین اوستونه بوراخدی . امر وئردی کی ، اونا توخونان اولماسین . قاریشقا تاخیلی یوواسینا داشیماغا باشلادی . او گون کئچدی . صاباح حضرت سولئیمان گلدی . گؤردو بیر ده‌نه ده تاخیل قالماییب . دئدی : قاریشقا ، بو سؤزون ده دوغرو چیخدی . ایندی سه‌نین عاقلینی سینایاجاغام . گئت ، حاضیرلاش ، صاباح قوشونوملا سه‌نه قوناق گه‌له‌جه‌یم .

قارشقا یوواسینا گئتدی . قاریشقالارین حامیسینی چاغیردی . حضرت سولئیمان اوچون هر نه لازیم ایدی ، حاضیرلادی لار . صاباح آچیلان کیمی حضرت سولئیمان آتین مینیب قاریشقایا قوناق گلدی . قاریشقا حضرت سولئیمانی قارشیلادی . حضرت آتدان دوشدو . قاریشقا یولداشینا دئدی :

- آت لاری تؤوله‌لره چه‌کین .

قاریشقا لار آت لاری تؤوله‌لره چکدی لر . بو قاریشقا اؤزو ده حضرت سولئیمانلا قوشونونو ائوه آپاردی . قوناق لار خالی اوستونده اوتوردولار .

قاریشقا دئدی :

- یئمه‌ک گه‌تیرین .

قاریشقالار گوموش ، قیزیل سینی لرده بوغلانا - بوغلانا یاغلی پلوو گه‌تیریب قوناق لارین قاباغینا قویدولار . قوناق لار لذذتلی آشدان یئییب دویدولار .

حضرت سولئیمان دئدی :

- قاریشقا ، یاخشی قوناقلیق وئردین . سندن راضی اولدوم . دور بیر سه‌نین جاهی - جلالینا باخاق .

قاریشقا دئدی :

- اوندا سن ایختییار اوزویونو منه وئر . بوردان قاییداناجان منده قالسین . بورا مه‌نیم مولکومدو . سه‌نین بورادا حؤکم ائله‌مه‌یه ایختییارین یوخدو .

حضرت سولئیمان دئدی :

- وئرمه‌رم ، بو شرطله کی ، گرک ایتیرمه‌یه‌سن . بوردان چیخاندا یئنه اؤزومه قایتاراسان .

قاریشقا دئدی :

- وئر قورخما ، من امانت ساخلاماقدا قوچاغام .

حضرت سولئیمان اوزویونو قاریشقایا وئردی . قاریشقا اوزویو آلیب گئتدی ، یئنه تئز گئری قاییدیب دئدی :

- ایندی دور گئده‌ک ، منیم جاهی - جلالیمی گؤر .

حضرت سولئیمان دوروب قاریشقا ایله گئتدی . گؤردو بورادا بوغدا بیر یاندا تاغلانیب ، آرپا بیر یاندا ، داری بیر یاندا ، دویو بیر یاندا . هر یانا باخیرسان ییغین - یغیین ( آنبار - آنبار ) تاخیلدیر . آت لارین قاباغیندا آرپا داغ کیمی قالانیب . قاریشقالار یئره تؤکولن تاخلی دنه - دنه گؤتوروب آنبارلارا تؤکورلر . حضرت سولئیمان قاریشقا ایله بیرلیکده باشقا بیر داما گیردی . گؤردو بو دام دا آغیزینا کیمی یاراقلا دولودو . هر یاندا نیزه ، اوخ آسیلیب . قیلینج لار باش - باشا چاتیلیب . قالخان لار اوست - اوسته ، قالاق - قالاق ییغیلیب . حضرت سولئیمان بوردان دا کئچیب بیر داما گیردی . گؤردو بو دام جواهیرله دولودور . اورادان دا کئچیب سونونجو ( آخیرینجی ) داما گیردی . گؤردو بو دام دا اوزوکله دولودور . حضرت سولئیمان باخیب - باخیب دئدی :

- قاریشقا ، سنه سولئیمان ایختییاری نه لازیم ، اؤزون ائله بیر سولئیمانسان . وئر منیم ایختیار اوزویومو گئدیم .

قاریشقا دئدی :

- حارا گئدیرسن ؟ عهدینه وفا ائله . بیر اوزوک نه‌دی کی ، اونو دیله گتیریرسن . آختار بو اوزوک‌لرین ایچیندن اؤ ازین تاپ گؤتور .

حضرت سولئیمان آییلدی کی ، اوزویونو تاپسین گؤتورسون ، باخدی کی ، بوتون اوزوک لرین قاشیندا سولئیمان یازیلیب ، حامیسی دا بیر - بیرینه اوخشاییر . دئدی :

- قاریشقا ، بو اوزوک لرین حامیسی سولئیمان آدینادیر . بونلاری حارادان ییغیبسان ؟

قاریشقا دئدی :

- آ حضرت سولئیمان ، سن بیرجه اوزونو گؤرورسن . من بون لاری سولئیمان لارین یئر - یوردوندان ییغمیشام .

حضرت سولئیمان قاریشقا یا دئدی :

- گؤرونور ، یاشین چوخدور ؟

قاریشقا دئدی :

- دونیایا گؤره حه‌له جاوانام .

حضرت سولئیمان دئدی :

- قاریشقا ، دوستون کیم ، دوشمنین کیمدیر ؟

قاریشقا دئدی :

- منیم دوستوم تورپاق ، دوشمه‌نین سؤزونده دوغرو اولمایان لاردیر .

حضرت سولئیمان دئدی :

- قاریشقا ، من سؤزومده دوغرویام . دئ گؤروم ، سؤزلرینین دوغرولوغونا گؤره منده نه ایسته‌ییر سن ؟

قاریشقا دئدی :

- سندن هئچ نه ایسته‌میرم ، بیرجه بیزیم نسیلدن خراج آلما .

حضرت سولئیمان دئدی :

- بوندان سونرا سیزین نسیله خراج یوخدور مه‌نیم اوزویومو تاپ ، وئر گئدیم .

قاریشقا حضرت سولئیمانین ایختییار اوزویونو تاپدی ، اؤزونه وئردی . حضرت سولئیمان آتلاندی ، قاریشقا ایله خوداحافیظله شیب ، قوشونو ایله واریب گئتدی .

ناغیل قورتاردی . سیز ساغ من ده سالامات .


 

یازان: علی تبریز لی * 87/09/20 ساعات 20:0 * ناغیل لار عالمی | ثابیت لینک