یاشاسین آذربایجان

 

هر گئجه من صوبحه كيمی بی قرار

 

آغلاميشام آغلاميشام زار زار

 

گؤز ببگيمده گؤرورم من سنی

 

جمله گؤزل ليك لر اولور تار و مار

 

گؤيده بولود گؤردو سنی آغلادی

 

گؤز ياشينی توكدو يئره شار شار

 

پاكلادی توزدان اوزونو چای چمن

 

گوللر آچيب اويناغا گلدی باهار

 

باش گؤتوروب باشلادی سو آخماغا

 

داش تپه يه چالدی باشين آبشار

 

دريادا ديل سيز بالغين گؤزلری

 

قدرت ـ ی حقدن دانيشير آشكار

 

بير باخيشين عرشی ايشيق لانديرير

 

يئرده ايشيقدان يارانير شاهكار

 

لاله گؤزونده نه گؤزل ليك گؤروب

 

تا گؤز آچان گؤندن اولوب داغدار

 

گؤيده كی يئلر سنه خاطير اسير

 

باشين اوجالدير سنه خاطير چنار

 

بيرده سالارسان منی منسيز ليگه ؟

 

سال كی گؤزومدن دوشه دار و ندار

 

سن كی منيم غصه لی قلبيمده سن

 

آخ گنه من سسله نيرم ، يار ، يار

 

داد ائله ديم داديمه ائللر گليب

 

باشيمه يكسر ييغيشيب قونشولار

 

هر بيری سؤز بير دره دن باشلادی

 

قارغا كيمی سالديلار هئی قار ـ قار

 

گاه دئديلر بو يازيغين قلبيدی

 

يا سرطان دردينه گلميش دوچار

 

رنگی سولوبدور ساراليب گؤ‍زلری

 

يا جگريندن قيريليبدير دامار

 

بو دلی دير بو دلی دير بو دلی

 

يوخسا نه دن صوبحه كيمی سيزلايار

 

آغلادی بيچاره قيزيم سؤيله دی

 

يوخ بابامين دا يئنی بير دردی وار

 

« من بيليرم ائوده دووارلار بيلير

 

اؤلدوره جكدير بابامی درد يار »

 

 

یازان: علی تبریز لی * 87/12/09 ساعات 21:50 * اوستاد هوشنگ جعفری | ثابیت لینک

 

 

باخدیم دالیسیجا یار گئدنده

 

بیر یولدا دئدیم باخار گئدنده

 

باخدی قاپیدان گئچنده گولدو

 

بیلمیردی اوره‌ک‌ اومار گئدنده

 

باغلاندی دیلیم اوره‌کدن آمما

 

آز قالدی چئکم هاوار گئدنده

 

گئتمه ، گئدیسن ؟ یاواش یاواش گئت

 

جانیم بیلیسن چیخار گئدنده

 

دوندر گؤزونو ، خومار خومار باخ

 

قویما منی ده ، خومار گئدنده

 

سن سیزلیگه دؤزمه‌گیم چتیندی

 

گل جانیمی آل قوتار گئدنده

 

سندن سورا عشقی نئیلیرم من

 

آل عشقینی ده آپار گئدنده

 

مهر ایله نوازش ائیله بلکه

 

گول بیتسین اوره‌کده ، قار گئدنده

 

من گؤر نه دئییردیم اؤز اؤزملن

 

قول بوینوما بیر سالار گئدنده

 

بیچاره اوره‌ک بولود کیمین دیر

 

گؤردوکجه سنی دولار گئدنده

 

دای « جعفری » بسدی شعر یازماق

 

سندنده بیر آد قالار گئدنده

 

کیم چئگنینه آلدی سالدی خلعت

 

سؤز اوستادی ، شهریار گئدنده

 

ایراندا هونر دیلنچی لیک دیر

 

باخما کی تاپار ویقار گئدنده

 

 

یازان: علی تبریز لی * 87/11/05 ساعات 18:40 * اوستاد هوشنگ جعفری | ثابیت لینک

       

          يار آغلادى

   اوستاد هوشنگ جعفرى  

 

 

( اوستاد بو گوزل شعرينى اؤز ياشاييش يولداشينا دئييب دير )

 

***

 

يارين بويون قوجاقلاديم ، يار آغلادى من آغلاديم

 

ييغيشدى قونشولار بوتون ، جار آغلادى من آغلاديم

 

 

باشيندا قار قالان داغا ، دانيشديم آيريليق سؤزون

 

بير آه چئكيب باشينداكى ، قار آغلادى من آغلاديم

 

 

طاريمدا نار آغاجلارى منی گؤروب دانيشديلار

 

بويومو زيتون اوخشادى ، نار آغلادى من آغلاديم

 

 

ائله كی اسدی بير خزان ، تالاندى گوللريم منيم

 

خبر چاتينجا بولبوله ، خار آغلادی من آغلاديم

 

 

اوره ك سؤزون دئديم تارا ، سيملر اولدو پارا پارا

 

ياواش ياواش سيزيللادى ، تار آغلادى من آغلاديم

 

 

دئديم كی حق منيمكیدى باشيمی چئكديلر دارا

 

طناب كسنده بوينومو ، دار آغلادى من آغلاديم

 

 

« جعفرى » يم ؛ بويوم بالا ، غم سينه مده قالا قالا

 

يار جانيمی آلا آلا ، يار آغلادی من آغلاديم

 

 

یازان: علی تبریز لی * 87/07/11 ساعات 20:47 * اوستاد هوشنگ جعفری | ثابیت لینک

                    

                       نغمه 

                                                                     اوستاد هوشنگ جعفری

 

 

گينه آرغين ، گينه يورغون ، گينه بير غملي اوره ك

يارالي قوش كيمي چيرپينما دادير

گينه نيسگيللي اوره ك يانما دادير

كؤز كؤز اوسته قالانير نئله مه لي

آليشير دالغالانير نئله مه لي

سرّيمي نه آتا بيلدي نه آنا

گئديرم چيلله خانا – چيلله خانا

 

من گرك يار يانان اودلاردا يانام

يار دئييب يار دولانام

نه روا عشقي دانام – من باهار نغمه سي يم

نغمه آديم – گلميشم عشق زليخا ياراديم

هاني ليلي – هاني شيرين

قويام حسرتلي باشي ديزلرينه

بير باخام غمله دولان گؤزلرينه

دئيم عاشق اودور اودلاردا يانا –

نه دئييم چيلله خانا – چيلله خانا

 

گئديرم دونيا بويو داردي منه

يانماسام عشق اودونا عاردي منه

آجيميش عشقي شيرينلشديره ره م

آيري دوشموش ائلي بيرلشديره ره م

داغيت اؤلكمده دئسين قوشلاريميز

اوخشاسينلار بيزي تاي توشلاريميز

من او غفلن جاداسين تاپلاماديم

نازلي يار گئتدي آياق ساخلاماديم

يار ائشيكدن اؤزون يانديردي

من ايچيم ياندي ، مني ياندير دي

سانما نغمه ال آياق چالمادادير

يارين عشقي جانيمي آلمادادير

ليلي بو قرينده اولسايدي اگر

يانديراردي اوزونو عشقه مگر

عشق سلطاني فرج وئرسه بيزه

سئل اولوب گؤزياشي دؤنمز دنيزه

شيشه ي عمري چاليب سينديرارام

عشق اوتوندا اؤزومو يانديرارام

دولدوروب كاسه ي صبري جالارام

چيخارام داغلارا هاي هاي سالارام

نازلي يار گئتسه نه جور تك قالارام

ايسته يير باشيما دونيا دولانا

گئديرم چيلله خانا – چيلله خانا

 

وا مقين جاندان گئچن عذراسي يام

من يانان مجنونيمين ليلاسي يام

من محبت عشقي نين درياسي يام

نغمه والاسي يام عاشق شيداسي يام

عشقده فرهاد و شيريندن باشام

اصلي يه عشق عالمينده يولداشام

 

كيم تيكر دونيا باغين باغچاسينا

كيم بوكر عشقي عاقيل بوغچاسينا

سانمايين عشق اؤلوبدور ، ديريدي

نغمه عاشيق سيراسيندان بيريدي

تاپارام عشقيمي هر يئرده اولا

قويمارام تك دولانيب رنگي سولا

ايندي داي گئتمه لي يم هر نه اولا

 

عشق دريادي عاقيل قطره سيدي

نغمه نين سون سسي عاشيق سسي دي

منه دونياده اؤز عشقيم بسيدي

سؤيله مندن گنه بير غملي سلام

سئوديگيمدن مني آيري سالانا

گئديرم چيلله خانا – چيلله خانا

 

سن آغير داغ كيمي داغلار باشيسان

بير عؤمور دور سينه ده غم داشيسان

سن كي مندن سورا ايللر ياشيسان

سن كي زنگانليلارين يولداشيسان

بير چيغير بلكه ياتانلار اويانا

گئديرم چيلله خانا – چيلله خانا

 

 

یازان: علی تبریز لی * 86/12/24 ساعات 11:9 * اوستاد هوشنگ جعفری | ثابیت لینک

        

       شکیل

                                       اوستاد هوشنگ جعفری زنگانلی  

 

بیر ائلی بوراندا قاردا چئکه جم

بیر ائلی باهاردا واردا چئکه جم

 

بیر شکیل چئکه جم  گوز گیله سینه

آرزیلار دوزوله سیل سیله سینه

بیر باهار سالاجام قیش چیله سینه

بیر لالا خونچاسین قاردا چئکه جم

 

بیر داغی چکه جم دومان ایچینده

بیر یاخشی بیتیرم  یامان ایچینده

بیر حقی دوغرولدام  گومان ایچینده

شاخدادا بیر آغاج باردا چئکه جم

 

بیر سئلی چکه جم سارا قوینوندا

بیر دیلی آسیلی چاردا قوینوندا

بیر ائلی یاردیم سیز یارا قوینوندا

بیر دیلی دیلچک سیز داردا چئکه جم

 

تیکیلی بیر آغیز ، چئکه جم  بوما

بیر درین باخیش کی ، فیکیره جوما

یوللایام شکیلین تهرانا ، قوما

بیر ائلین یوخلوغون واردا چئکه جم

 

بیر ایشیق چئکه جم اوزاقدان آتیب

بیر دنیز چئکه جم  دنیزه باتیب

بیر ائلی چئکه جم مین ایلدی یاتیب

وارلیغین بیلمیرم هاردا چئکه جم

 

نئیله ییم دیل سیز بیر ، باش چئکنمیرم

سینمده اوره ک  وار ، داش چئکنمیرم

ائلیمین گؤزونده ، یاش چئکنمیرم

بو ائلین ماهنی سین ، تاردا چئکه جم

ائلیمی باهاردا واردا چئکه جم

 

 

یازان: علی تبریز لی * 86/10/11 ساعات 22:59 * اوستاد هوشنگ جعفری | ثابیت لینک

               

 

                   حاققیمیزی                   

                                 اوستاد هوشنگ جعفری زنگانلی

 

 

بوزا یازمیشدی قیز اوغلانلی بیزیم حاققیمیزی

اریدیر بیر بئیینی قانلی بیزیم حاققیمیزی

پایلاییر تک کوللارا یارپاقلاریمی

دیلی ، آغزی ، الی قرآنلی بیزیم حاققیمیزی

گؤردوگون اوتدو ، دماوند قیمیللانمادی هئچ

یئنه اوتماز دئدی ایرانلی ، بیزیم حاققیمیزی

نییه گؤیلرده بولوددان ال آتیب آلمیرسان

ساوالان ای باشی طوفانلی بیزیم حاققیمیزی

دوتوبان نیسگیل الیندن دئدی خرمنلره باخ

سووورور گؤ نئجه سهمانلی بیزیم حاقیمیزی

ال آتیب ایندی قلمدن غزل ایستیر دفتر

اورداکی داندیلا دیوانلی بیزیم حاققیمیزی

قویمایین بارماغی حسرت قالا بال بارداغینا

یاخمایین کوللارا شان- شانلی بیزیم حاققیمیزی

گئجه بیر پالچیقا باتمیش کوچه دن سس گلدی

کورلادین آی کدر ایمانلی بیزیم حاققیمیزی

کتده بیر هیسلی دام التدا بویو عنبرچه قادین

ائله سؤیلوردو یاریم جانلی بیزیم حاققیمیزی

           

 

یازان: علی تبریز لی * 86/05/24 ساعات 17:52 * اوستاد هوشنگ جعفری | ثابیت لینک

 

 

 ساوالان

                           اوستاد هوشنگ جعفری زنگانلی 

 

اوچور ایلهامیم او قوشلار کیمی کی

یاز وعده سینده

قووزانیر ماوی گؤیه تا اوجا باش بیر داغا قونسون

کؤرپه قارتال کیمی دیر

گاه چکیلیر گرزده ن ایتینجه ک

اگله نیر گاه ساوالان عشقینه – آغدان – آغاقونسون

هر اوجا داغ کی گؤرورسن باشی قاردلا آغاراندی

اورا بیل کی ساوالاندی

آمما یوخ !

هر اوجا داغ سسیمی السا دا تئز قئیته ره جکدی

سسی قئیته رمک همان یئل بیله جکدی

آخی یئل یولچودو گئتگین اوکی سؤز ساخلایا بیلمز

یئل سؤزو قاپدی قاچیردار اونو کیم هاخلایابیلمز

یئل گئدرگیندی پیچیللارسؤزوکوللار قولاغیندا

سؤزو قربان ائله یر قیرنادا قانقال آیاغیندا

چئویره ر سؤز چاناغیندا

جالایارداغلارا هر بیر سؤزو مین سؤز تؤره دندی

بیلمیرم سیرری ندندی

یئل گئده ر گیندی یئلی ساخلاماق اولماز

یئله بئل باغلاماق اولماز

 

آمما سن ای سؤزو سینه نده کؤزردن ساوالانیم

کیم گله صدقله زرتشت بئجردن ساوالانیم

ائلیمین شانلی داغی باشیوه مین لرجه دولانیم

اریدیب ائل غمی بیر یول سنی کؤکدن ده تالانسان

سئل اولوب قانلی دنیز لر کیمی دونیایه جالانسان

آدی دیللرده قالاناسان

ساوالانسان ، ساوالانسان

ساوالان ائل غمینی بللی دی ساخلار سینه سینده

سینه سی کؤزدو آلودور گیزیریک اینسی سی واردیر نفسینده

شاعرین غملی سه سینده آلگیلان ساخلاسن ای ائل داغی غملی قفسینده

ساوالان آلسادا هر سیرری سؤزو داغلارا سالماز

گؤره نامرد دوروبدور ساوالاندان سس اوجالماز

ساوالاندا تؤکولن داشلاری دیندیر دانیشاللار

سالسا عاشیق نفسین کوللارا آلیشاللار

ده ده قود سازی چالسا

ده لی دومرول باش اوجالدار

بلی البته کی یولداس باشینی یولداش اوجالدار

سسله عاشیق سازی چالسین

سسی میز بیرده اوجالسین

اویناماقلیز گی یه دؤنسون

کاس شوشمگوزگویه دؤنسون

قوی وئره ک سس سسه باهم اوخویاق بیر ده کوراوغلو دلی سیندن

هجرین قوچ نبی سیندن

اوکی ظالیملری مظلولارین اوستونده ازه ردی

او کی آسلان کیمی داغلاردا یاتیب باغدا گزه ردی

اوخو عاشق اوخو

سن بیل او کی تانری تانییبسان

سؤزومه دوز جالییبسان

سوموگوم قوی سازا گلسین

بولبولوم آوازا گلسین

یازمیشام ایوازا گلسین

گوچ آلاق قوی دلی لردن

باج آلاق اجنبی لردن

او کی بیلمیر نبی کیمدیر قویون آذرائلینی مسخره سانسین

بیر عؤمور دورکی فضولی نی –  نسیمی نی دانیب ایندی ده دانسین

شهریار تک سن اوجالت باشیوی قوی عرشه دایانسین

قوی باخار کور تر ایچینده جوموبان اؤلسون – اوتانسین

اوکی آخساخدی یوبانسین

اوکی تورکون دیلین اسگیتمه گه تصویره سالیبدیر

اوکی تورکون بالاسین ایندی ده آشغالچی سانیبدیر

او تفاله بیلیرم فیکیرینی طاغوتدان  آ لیبدیر

او رژیمدندی قالیبدیر

یوخسا تورکون بالاسیندا نچیخیب علامه ی دوران

اونا دونیا باش ا ییر فلسفه ده

بیر جه نه ایران

قوی دئییم شهریاریمدان

نیسگیل او چرچی یه قالسین کی جواهر نه دی ، قانمیر

فیکری آللاتما دادیر خالقی ،ائلین حالینه یانمیر

اریمیر ، اؤلمور ، اوتانمیر

آخی ای قاردا ، دوماندا باش اوجالدان ساوالانیم

غمی ، دونیا نی قوجالدان ساوالانیم

ائل بیلیر داغلار آرا هراوجا داغلار باشی سن سن

وئرسهنده الیوی قارداشیوین سیر داشی سن سن

وئر گیلن بیر لیک الین بیرده دماونده اونون یولداشی سن سن

اوندان آیریلما آماندی

یولوموز چندی دوماندی

قوی ایگیدلر سیزه فخر ائیله ییبن باشان اوجالتسین

قویما قارتال دولانان یئر لره قوز غون الی چاتسین

ساوالان چنلی چاغیندا

منیم ایلهامیم اولارکن

کؤنلوم اؤز سرری سؤزون صدق ایله سؤیلر ساوالانه

ساوالان کؤز قالادار شاعر اولانلار سینه سینده

اوردا زرتشت گئیب تانریدان ایلهامین آلانه

اگیرم باش ساوالانه ، اگیرم باش ساوالانه

 

 

 

 

یازان: علی تبریز لی * 86/04/12 ساعات 20:16 * اوستاد هوشنگ جعفری | ثابیت لینک