یاشاسین آذربایجان

 

بير اليمده قلم، بير الده كاغاز
خياليم بويلانير دامدان، دوواردان
باشيمدا يار باغين گزمك هاواسي
قاپيلار باغليدير، يول تاپيم هاردان

حاصارين داليندا كٶنول وئرديييم
او يار بير باغ ساليب، سويو بولوردان
هايواسي كهروبا، ناري ياقوتدان
تاغي فيروزه دن، ديواني گولدن

ماوي ائيوانيندا ساز چالير زٶهره
بوروجوندا ياي چكيب، دايانيب كئيوان
لاييقي وار گيره م قصرينه من ده
قيللي پاپاغيملان، سينيق سازيملان؟

او بو ائحتيشاملا، بو طمطراقلا
قاپيسين اوزومه آچماسا نه وار
شاهلا رعييتين صٶحبتي توتماز
من بير اوبالييام، اودور شهرييار

گره ك روخصت آلام حئيدربابا´دان
"يوخ" جاوابي بلكه منه وئرمه سين
بير ده شهرييار´دان فرمانيم واردير
"شاعير بير بيريني اولور گٶرمه سين؟"

يوخ، من ده سهند′ه م، باشيم اوجادير
ايچيمده سٶنمه يه ن عئشق آتشي وار
منده صفاسي وار گوللو باهارين
باشيمي توتسا دا قارا بولودلار

لاله لي چيچه كلي چمنلريمده
گليب يورد سالسا دا چوبان-چولوقلار
يالواررام صفامدان اوز دٶنده رمه سين
شهرييار´ا لاييق "شاه يوردو"م دا وار

كٶنلوم هاواسييلا قول-قاناد آچير
قاف قالاسين آلماق دئيه اوجالير
قالخديقجا بوي آتير داش دووارلاردا
آليجي ترلانيم يورولور، قالير

دووارلار، دووارلار، پولاد اولساز دا
آلماز ميشار اوللام، كسيب بيچه ره م
كولونگون بورج آللام فرهاد بابا´نين
بيسوتون اولساز دا، چاپيب گئچه ره م

دووارلار، دووارلار، يول وئرين گئچيم
وولقانام، نفسيم توفان قوپارار
بولودام، ساللانسا قاشيم-قاباغيم
آغلارام، عالمي سئللر آپارار

بير اليمده اود وار، بير اليمده سو
بير اوزوم قاراقيش، بيري باهاردير
دوستا، ايسته كلييه ايستي قوينوم وار
دوشمانا باخيشيم شاختادير، قاردير

ايچيمده بوغولور داديم، هاراييم
نه دووار هاييما هاي وئرير، نه يار
نه داشدان سس چيخير، نه ده قارداشدان
سانكي بوشلوقلاردا ايتير دالقالار

بيلميره م بلكه ده بو بير خيالدير
يا دا كي سئحردير مني آلدادان
دئييرلر ديلبريم بولور قصرينده
داردادير، آسيليب تپه ساچيندان

سهند´ي قورخوتماز نه ساراي، نه سئحير
محببت دئييله ن بير افسونوم وار
هم ايسم-ي اعظم´دير، هم ايسم-ي شب´دير
باغلي قاپيلاري اوزونه آچار

آچيلين، آچيلين باغلي قاپيلار
محببت نامينا، ايسته ك نامينا
ارييين، تٶكولون دمير قيفيللار
كٶنول خاطيرينه، اوره ك نامينا

گلير قولاغيما اينيلتيلري
بوردا بير شئر داردا قاليب باغيرير
دوغرودان دا من بير "مورووتسيز"ه م
قارداشيم داردادير، مني چاغيرير

چكيلين، چكيلين، يول وئرين گئچيم
اوره ييم آليشيب، آلوو ساچارام
شهرييار بوينونا زنجير وورالار
چئينه ره م، گميرره م، دارتيب آچارام

ايشله يير قولوما دمير پاخلالار
زنجير قيجيقديرير، سانجير اتيمي
جان قارداش، هله ليك باغيشلا مني
دئيه سه ن اونوتدون اسارتيمي

عزيز شهرييار´يم، باغيشلا مني
اينجيمه، داريلما، فيكرين هاردادير؟
مورووتسيز دئييل سنين قارداشين
آنجاق سنين كيمي او دا داردادير

اٶزون دئمه دين كي بيزيم ائللرده
وكيل مووككيلين خرجيني چكه ر،
آنا عئشق اوجاغي سٶنمه سين دئيه
اوره ين اريده ر، چيراغا تٶكه ر؟

هر ياني بيلميره م، بيزيم ديياردا
هئچ ده خيال دئييل، دوستلوق، محببت
آنجاق ايشيق ساچان ايستي گونه ش ده
بعضن بولود آلتدا گيزله نه ر، البت

نه بيليم بلكه ده سولطانيم قارداش
ايشين عئيبي بيزيم اٶزوموزده دير
همين بو ايلقارين دوشگونويوك بيز
گوناه ياددا دئييل، گوناه بيزده دير

بير اوووج كلكباز، قومارباز ايله ن
پاكباز اولموشوق، پاك اوتوزموشوق
مرد ايكن، نامرده رحم ائيله ميشيك
ايندي نامردلره مٶحتاج اولموشوق

دٶولتلييه ساخسي لازيم اولاندا
ووروب سينديرميشيق اٶز كوزه ميزي
چيخديغيميز قيني به يه نمه ميشيك
بيز ائلي آتميشيق، ائل آتيب بيزي

ائليميزه نه گون آغلاميشيق بيز؟
باغين شاختا ووروب، بوستانين ياريب
ائل بيزه نئيله سين، نه گون آغلاسين؟
آغزي اوچوقلاييب، ديلي باغلانيب

ايندي اولان اولوب، گئچديلر گئچيب
جالانان سو بير ده كوزه يه دولماز
دالدان آتيلان داش توپوغا ده يه ر
گٶز ياشي تٶكمكله ن يارا ساغالماز

بو گون من سهند´ه م، سن شهرييار´سان
گل باشين اوجالداق قوجا تبريز´ين
بير كره يادلارين داشيني آتاق
چكه ك قايغيسيني اٶز ائليميزين

وفاسيز گوللرين اوستوندن اوچاق
قوناق صداقتلي ائل قوجاغينا
سٶنمه ز عئشقيميزدن بير پئيوند سالاق
ائلين شاختا وورموش گول بوداغينا

شاعيريم، دونياني نئجه گٶرورسه ن
دوز يئييب، دوز قابين سينديرانلار وار
قدير بيله ن يارا جان قوربان ائيله
قدير بيلمه يه نه حئييفدير ايلقار

اٶزگه چيراغينا ياغ اولماق بسدير
دوغما ائللريميز قارانليقدادير
يانيب، يانديرماياق يادين اوجاغين
ائويميز سويوقدور، قيشدير، شاختادير

دئميره م، يانماياق آلوولانماياق
يانماسين، نئيله سين يازيق پروانه؟
يانماياق وفاسيز يارين اودونا
ياناق ائليميزه، ياناق وطنه!

بير يئرده قالماقدان داريلديق، اٶلدوك
دوغما يوردوموزو دولاناق، گزه ك
ائل ايله ن آغلاياق، ائل ايله ن گوله ك
اينجيميزي وطن ساپينا دوزه ك!

او عزيز ديياردا، دوغما شهه رده
شاعيري جوشدوران صحنه لر چوخ وار
نيسگيللري چوخدور دردلي تبريز′ين
بيري سن اٶزونسه ن، عزيز شهرييار!

بورج آلتيندا ياشاماق ياماندير، قارداش
بورجلويوق، بورجلويوق هم من، هم ده سن
گٶر نه روزيگاردا، گٶر نه گونده دير
شهرييار بسله يه ن بو ائل، بو وطن!

چكه ك شئعر توپون، هايدي، قارداشيم
سن حئيدر بابا′يا، من ده سهند′ه
شاعيرين سيلاحي نغمه دير، سٶزدور
نغمه ميز ياييلسين شهه ره، كنده

يازاق، هر ميصراعيميز بير بايراق اولسون
حقيقت بايراغي، ظفر بايراغي
پارلاسين ماياق تك، يانسين چيراق تك
گله جك ماياغي، اومود چيراغي

اينديليك ضعيف بير داملا اولساق دا
سوزوله ك، ييغيلاق، گٶل اولاق، آخاق
قاريشيق چايلارا، داشقين سولارا
دره لردن گئچه ك، دنيزه چاتاق

شيلتاق لپه لره قوشولاق، جوشاق
سوزه ك دالقالاردا سونالار كيمي
گون وورسون، ياغيشلي بولودا دٶنه ك
اوچاق، هاوالاناق دورنالار كيمي!

اسسين اوستوموزه سويوق كوله كلر
بوزاراق، توتولاق، قارالاق، ياغاق
سئل اولاق، آغناياق اوجا داغلاردان
يئرلي قايالاري ديبيندن قازاق!

داغلاري قوپاراق، دره لر دولسون
كٶپوكلو سولاري جالاياق دوزه
ياشارسين قوروموش كوللاريم كٶكو
باهاري قايتاراق وطنيميزه

چايلارا سد ووراق، ظولمه حد ووراق
حاقلارا تاپشيراق حاققي هر يئرده
قيسير قومساللارا جومماسين سولار
زميلر گٶز گٶيه تيكمه سين بير ده

كسه ك عداوتين، كينه نين كٶكون
عئشقدن يئني بير قورولوش قوراق
مينه ك شاهابلارا، ايلديريملارا
گئده ك اولدوزلارا، گونه شه قوناق

سحر بولاغينين آريداق گٶزون
ايشيقلار قايناسين، خارراخار آخسين
چيزينسين يالينجيق، چيلپاق مئشه لر
بو داغلار دٶشونه گول-چيچه ك تاخسين

سهند ده گول آچسين، حئيدربابا دا
اوزه رينده چادير قورسون شهرييار
باخاق چيچه كله نه ن يوردا، شئعر يازاق
شاعير ده بختييار، شئعر ده بختييار!

شاعيريم، يوبانما، يولدادير كروان
قولاق آس، دونيادا گٶر نه بير سسدير
باغريني سيخماسين آتيلان توپلار
قيريلان زنجيردير، سينان قفسدير

 

                                                                      بولود قره چورلو

 

یازان: علی تبریز لی * 88/05/23 ساعات 12:15 * بولود قره چورلو (سهند) | ثابیت لینک

 

بولود قاراچورلو« سهند» ۱۳۰۵- نجى ايلده ماراغا شهرينده ، باهارين طبيعته جان وئرديگى ، داغلار- دره لر ياشيل دونونو گئيديگى ، قوشلار شوقه گليب جه جه ووردوغو گونلرينده آنادان اولموشدور. گنچ مطلب ، آتا اولاجاق شوقى ايله ، نگران و صبرسيزليكله ، يان اتاقدا قدم وورور.

گؤزلرين آيدين اولسون ! اوغلون اولدو دئيه اونا موشتولوق وئريليركن ، گؤى شدتله گورولدادى . ايلديريم شاخدى . قارا بولودلار داملالارينى سپه لمه يه ، سئللر- سولار شاققيلدايب آخماغا باشلادى . جوان آتا بونو خئيره ووراراق ، اوغلونون گؤيدن اه نن بركت و رحمت ايله دونيايا گلديگينى سؤيلدى .

بلكه ، ائله بونا گؤره ده اوغلونون آدينى « بولود» قويدو.

سيجيلى آليركن ، بولود سؤزو اداره ده كيلره ، « آنلاشيلماز» اولدوغوندان ، « بهلود» يازسالاردا ، هامى اونو « بولود» سسلردى .

دوغودوغو عائله يوخسولدا اولسا ، ( آتاسى شوفر، آناسى ائو قادينى ايدى. ) جئيران خانيمين ايستى قوينوندا نوازش ، محبت و اوره ك اوخشايان لايلايلارى ايله ديل آچيب بويويور. آتا قايغيسى ايله فرحله نيب ، ياشا دولور، بولود هميشه آتاسينى درين بير احترام و آناسينى سؤنمز الهى بير عشق ايله ياد ائدردى .

او، بير خلق شاعرى اولاراق ، وطنينى آزاد ، خلقينى خوشبخت گؤرمك ايسته آيردى . افسوس !... كي آمانسيز اؤلوم اونو آزادليغين ايلك باهاريندا بيزدن آييردي . « سهند» « ساوالان » ، « حيدربابا داغلارينين اتكلرى لاله ، ياسمنله دولدوغو، ككليكلرى قاققيلداديغى بولبوللرى جهجه باشلاديغى زمان؛او بؤيوك انسانى، شعر و ادب شاهينينى بيزدن آييردى . »  قايناييب - قالخان شعر بولاغينى قوروتدو.

آنجاق ، او، اؤلمه ييب ! آلوولانديرديغى شعر و هنر مشعلى ايله اؤزو اوچون بير ابديت ياراديب .

« شاعيرين عالمى اؤلمز ، اونا عالمده زوال يوخ ! »

دئين بؤيوك شهريارين دئديگى كيميدير . او وطن وآزادليق اوغروندا ايشيق سالاراق ، شمع كيمى اريسه ده ، خلقينين اوره يينده هميشه ليك ياشاياجاق ، عاشيقلارين سازيندا ، خاننده لرين نواسيندا ياد ائديله جكدير.

«  سهند » - «  شهريارا » يازديغى نامه سينده :

 

داغلارى قوپاراق ، دره لر دولسون ،

كؤپوكلو چايلارى جاليياق دوزه ،

ياشارسين قوروموش كوللارين كؤكو،

زميلر گؤز، گؤيه تيكمه سين بلكه .

 

«  سهند »‌ ده گول آچسين ، « حيدربابا » دا ،

اوزرينده چادير قورسون «  شهريار » .

باخاق چيچكله نن يوردا ، شعر يازاق .

شاعرده بختيار ، شعرده بختيار .

 

دئيه ، آرزولاديغى آزادليق باغينين بارينى درمك قسمت اولمادى . بو بيزيم اوچون يامان بير نيسگيل ، ساغالماز بير يارا اولدو .

او، هله اون ايل بوندان قاباق يازديغى شعره اؤز آرزو و ايستكلرينى ترنم ائتمكله ، ظلم ، ستم سارايلارينين داغيلا جاغينا اينانيردى . آزادليق جارچيسى كيمى ، گله جكدن مژده وئره رك :‌

 

شاعريم ! سؤزومو غربته سالما !

قولاق آس ، دونيادا گؤر بيرنه سسدير .

باغريوى سيخماسين آتيلان توپلار ،

قيريلان زنجيردير ، سينان قفسدير . دئير

 

« سهند» ۱۳۵۸- نجي ايلده فروردين آينين ۲۱- نده گئجه ساعت ايكيده قلب خسته ليگيندن ،‌ ابدى اولاراق حياته گؤز يومدو . اونون اؤلومو خلقيميزاوچون ملي بير ماتم ، ادبياتيميز اوچون يئرى دولماز بير ايتگى اولدو.

 

گنجعلى صباحى

 

بو مقدمه وارليق درگى سينده چاپ اولونوب .   

 

 

یازان: علی تبریز لی * 87/03/13 ساعات 15:41 * بولود قره چورلو (سهند) | ثابیت لینک

     یاساق

                   بولود قره چورلو (سهند)                                                   

                                                          

طالعیمه سن باخ !

دوشونجه لریم یاساق

دویغولاریم یاساق

کئچمیشدن سؤز آچماغیم یاساق

گله جکدن دانیشماغیم یاساق

آتا - بابامین آدین چکمه ییم یاساق

آنامدان آد آپارماغیم یاساق !

… بیلیرسین ؟

آنامدان دوغولاندان بئله

اؤزوم بیلمه یه - بیلمه یه

دیل آچیب دانیشدیغیم دیلده

دانیشماغیمدا یاساق ایمیش ، یاساق

          

 

یازان: علی تبریز لی * 86/06/31 ساعات 20:45 * بولود قره چورلو (سهند) | ثابیت لینک