ائلنور

 

آنانين سس سيزلييي بونو آرتيق آجيقلانديريردي . يوخسا آنا بيلمير بونون اوره يينده نه لر گئچير ؟ البته كي بيلير ، بلكه بوندان دا ياخشي بيلير ، آمما نه دن دينمير - دانيشمير ، بللي دئييل . اوچ آي دير حيات يولداشي بونو ترك ائديب ؛ گئديب . يالوارماق دا ثمر سيز اولوب . آناسي دئيير « ياشادئييل ، باشادير ! » دئمه ك بونو هئله اوشاق تصور ائدير ، ائولنمك ايسته ينده ده بونو دئميش دير . آناسي بونو دايما اوشاق تصور ائدير !

سئوگي له ائولنمك ايسته دي ، اونداكي قونشولوقدا يوخ ؛ ايكي كوچه ايره لي ده اگله شه ن قيزي سئودي . آناسي بير آياقي گئده ر - گئتمز او قيزا ائلچي گئتدي . « قيز اوغلاني سئومير » دئديلر . آنا ال اوزدي آمما « ابراهيم » ال اوزمه دي . بيرده گئتدي ، بيرده گئتدي نهايت قيزي آلدي . « كونول سؤز تيكه اوره گ آغريدار » آناسي دئدي آمما بو گولدو « هارداسان آنا ؟ انسانلار اولدوزلاري فتح ائديرلر ، بير اوره يي فتح ائتمه يه نه واركي ؟ » آناسي باشين تولاييب « سئوگي بازاردا ساتيلان بير شئ دئييل » دئميشدير . آناسينين طعنه لري بونو آجيقلانديرميشدي . « ايندي قئين آنا اولوب كيجيك دن دئيير » ظن ائدميشدي ، ؟آخي آنا اؤز گيزلي حاياتيندا خوش گونلر ياشاماييب دير . ابراهيم بونو ياخشي بيلير . آتا قاپويا آچار سالماق همين آنانين بونون اوجو سارالاردي « آمان آللاه ! يئنه گلدي دئيه ردي ، آياقا قالخيب ،اليندن چوره گي آلاردي آمما بير دونه اوزونه باخاندا يادينا گلميري .

بير دونه آتا ايله اگله شيب ؛ دئييب ؛ گولمه يين گورمه ميشدي . آنانين خوش گونو مطبخ ده و مرثيه لرده سوووشاردي . او ؛ بو سئوگي دن يقين كيجيك له نير !

قيزي آلدي ، ائوينه گئتيردي . چوخ سيرتيلماسين دئيه ؛ سئوگي دن سؤزو آچمادي ، بير كيشي كيمي داورانماق ايسته ييردي . آليردي ؛ گئتيريردي ؛ بير ساعت خوش اولوردو و يئري گلنده بير كيشي كيمي باغيريردي ، ووروب - ييخيردي ! بير ايل سوووشاندان سونرا ؛ قيزلاري « ائلنور » دونيايا گلمه دن اونجه بير گون ابراهيم اونون آناسي كيمي يئره باخماقين ؛ بورنونون سارالماقين دويدو . « بلكه تصور ائديره م ،‌ دئدي ، اوره يين تسكين له دي آمما آرتيق بو باره ده دقت وئردي . دوغروسو او ابراهيمين اوزونه باخميردي . هئچ سئوگي يوخ نفرت له ده باخميردي ! « چاره سينه باخارام » دئدي . صاباح ايسه آيين - اويون آلدي . اونو گزمه يه - يئمه يه آپاردي ، آمما او بويلولوغون باهانا گئتيريب « گزميره م - يئميره م » دئدي . عيني آناسي كيمي !

« آنا ! سن آتاني هئچ سئومه دين ؟ » سوروشدو . آناسي اونون جاوابين ازبرله يه ن كيمي دئدي « سئومه سه يديم دايانمازديم ». هئچ آتايا سني سئويره م دئييب سن ؟

آناسي گولدو . يئريندن قالخدي . او سؤزلردن - سورولاردان قاچماقا چوخ يئرلري واريدي . هئچ قيزدا بونو سئومه يين بيلديرمير ، يوخسا دايانماقي همين سئوگي دن دئييل ؟

ائلنور آنادان اولدو . عيني آناسي كيمي آلاگوزلو؛ چاتماقاشلي بير قيز . « قيز دوغان آرواد بللي ديركي آريني چوخ ايسته يير » ثريا خالا سي بونو دئدي . ابراهيم اوگون سئوينج دن اوچوردو . دئمه ك مني سئوه – سئوه دايانيب دير ، آمما نه دن ديله گلمير ، نه دن دايما يئره باخير ؟

اداره يئرينده شيريني قوطوسو اوطاق - اوطاق دولانيردي . « ابراهيمين قيزينين شيريني سي دير » - « قيز شيريني سي آرتيق شيرين اولور » - قيزيني منيم اوغلوما وئررسن؟ » و باشقا سؤزلر ايش يولداشلاري آراسيندا گئديردي . آتاليق ابراهيمي داها نظره بويوك گئتيريردي . آز دانيشيب ، چوخ ايشله ييردي . آنجاق فيكره گئديردي . اوز به اوز اولان ميزده اگله شن ايش يولداشينا باخاندا فيكري داها آرتيردي ... ايكي ايل بوندان اونجه اونون حيات يولداشي بوشانميش دير .« مني سئوميردي ، باشقاسين ايسته ييردي » دئميشدي . نه دهشت لي !! اولارمي بيرينين حيات يولداشي اونو سئومه سين ؟ آخي سئوگي نه دير ؟ سئوگي چوره ك اولماز - پالتار اولماز - ائو اولماز ، ياشايشا بونلار لازيم دير ، بونلار اونم لي دير . مين لر عائله سئوگي سيز ياشاييرلار ، بونلار نه دن ياشاماسين لار ؟ هئله ... ائلنور كي گلدي ، هر نه دئيشيله ر ... قيزدا ائوينه - عائله سينه آرتيق باغلانار . منده چاليشارام بوندان سونرا آجي سوزلريمي ترك ائده م ، خوش دانيشارام ، ايسته ر - ايسته مز  اونا آرتيق پار - پالتار آلارام ، اونو سئوينديرمه يه نه واركي ؟ ...

آمما ائلنور اونو اوزاقلاشديردي . « اوشاق ياتمير » دئيه ، ياتاق يئرينده اوندان آييردي . « اوشاقا سويوق دئيه ر » دئيه ، گزمه ك دن - دولانماقدان ال اوزودو ، بير دورت دووار - بير ائلنور ... هئله گيزلي ده آستا - آستا بو اوچ آيليق اوشاق يله دانيشيردي !

ابراهيمه دئمه دييي سيرلري اونا دئييردي ! « ده لي اولوبسان اوشاقي له دانيشيرسان ؟ » ، ابراهيم سوردو .« ده لي اولماقيما هئله قالير »

عيني آناسي كيمي ! آستا دئيير آمما اوستا دئيير . بونو آجيقلانديرماقا دايما حاضيرلييي وار . اولمايا باشقاسين ايسته يير ؟ بو فيكير ابراهيمين جانين بير الاو كيمي بوروردي . « اولدورره رم ... هر ايكيسين اولدوره رم ... اوزوموده ... ائلنورودا ... من « صادق » دئييله م ... بو غيرت سيزليه دوزمه ره م ... »

آجي فيكيرلر ، آجي سوزلر ، ابراهيمي بير دهشت لي انسانا چئويرميشدي . هاني سئوگي سيز گئده ن ياشايش لار ؟ نهايت قيز دوزمه دي . ائلنوري قويوب گئتدي . باشقاسيني سئومه دن گئتدي و ائلنورون سئوگي سين آتاراق گئتدي . آمما آناسي نه دن گئتمه ميشدي ؟

داها بو سوزلره فيكير وئرمه دن يورولموشدو . آنا اوزو بيله ر ، من قيزي هئله ده سئويره م ... او گلمه لي دير ، قانون لا اونو قايتاريب ائوينه سالارام ! اوشاقيني ساخلامالي دير ! او مني سئومه لي دير !

ائلنور آتانين اوز - اوزونه ال قول اولچوماقيندان گولدو . گولنده آناسي كيمي چنه سينده بير بالا زنخدان آچيليردي . « قيزيني منيم اوغلوما وئررسن ؟ » ايش يولداشينين سسي قولاقيندا جانلاندي ... « يوخ !وئرمه ره م ! سئودييي بيرينه وئره ره م ! » ابراهيم اوجادان باغيردي . ائلنور قورخودان قيشقيريب آغلادي . آنا قاپوني آچيب اوطاقا گلدي ، ائلنورو قوجاقينا آليب چيخدي ... سانكي هئچ نه اولماييب دير ... سانكي آغلايان تك ائلنوردي ...

سون

زهره وفايي - تبريز  

 


 

یازان: علی تبریز لی * 87/01/05 ساعات 19:54 * زهره وفایی | ثابیت لینک